جورج يونس *

بجاه عظمتو ومجدو وتواضعو، مش هيك علمنا يسوع كيف بكون الشخص مسيحي! لو كان يلبس ويعيش ببطر وتعالي مثلكم، ما كانت المسيحية عمت الارض وزرعت جبالنا قداسة.

هوي علمنا نحب بعضنا مثل ما هوي حبنا، علمنا ما نخطي ونرتكب معاصي، علمنا انو الله محبة، علمنا نكون متواضعين متلو، علمنا نترك كل شي ونلحقو، علمنا نعطف عالموجوعين والمظلومين والفقرا، علمنا انو ما لقيصر لقيصر وما لله لله، علمنا انو كل شي منعملو لاخوتنا عالارض فكأنما عملناه معو، علمنا كيف أسهل عالجمل يدخل من خرم الابرة من إنو غني يدخل ملكوت الله، علمنا كيف بيفتدي المعلم اتباعو بروحو ليخلصهم، علمنا انو لازم نطرد اللصوص من الهيكل، علمنا الرحمة والانسانية ومساعدة الغير...

بس أنا صرت أكيد إنو انتو فاهمين اللاهوت وتعاليم الانجيل والمسيحية غلط لانو يسوع ولا يوم كان بيشبهكم وبيشبه تصرفاتكم، ولا يوم كان عايش بالجاه والعزة اللي انتو عايشينها، ولا يوم كان ياكل افخم المأكولات وشعبو جوعان، ولا يوم قرب صوب الاكسسوارات المذهبة، ولا يوم كان يحمي اللصوص، ولا يوم كان يتجاهل وجع الفقرا والمرضى، ولا يوم كان يعمل احتفالات دينية فخمة، ولا يوم كان يتخلى عن اتباعو وقت الوجع والقهر والجوع، ولا يوم كان يفتح بوابو للرأسماليين واصحاب النفوذ ويتخلى عن الناس التعبانة، والاهم إنو كلامو كان ع مر الازمان نعم نعم ولا لا بدون ما يتراجع ولا مرة لا تحت وطأة السلاح الغير شرعي ولا تحت هوبرات الترهيب ولا تحت فرض خيارات مقاومة دمرت لبنان بمغامرات ومعارك اقليمية ما دخل بلدنا فيها وإنما بتفرض علينا نخسر دم خيرة شبابنا خدمة لمشاريع تيوقراطية...

ما تواخذوني بس انا فيه بين ايديي الانجيل وقدام عيوني افعالكم  ونكبة شعبي وما فيه شي بقول انكم الصخرة اللي بنى عليها المسيح كنيستو

سامحنا يا يسوع واتطلع فينا وبالمطرح اللي وصلنالو فقيامة لبنان من قيامة من اعطيَ له مجده

#وليد_الصرح #ابوكسم_الثنائي #مطر_الحزب #رحمة_مليتا #راهبة_غبالة #فادي_المهرجانات #مطران_بري #صارو_كتير_كتار

Share

Comments

Add your comment