جورج يونس

هني بفلو وبيطلبو منا نضل

هني بهاجرو وبِوَصونا نواجه

هني بيتفرجو وبيطلبو منا ننتفض

هني بِنَظرو ونحن منتلاحق

هني بعانقو الحياة ونحن منغمر العتمة

هني الحنين ونحن حطب القضية

هني لفحة الكرامة ونحن يوميات الذل

هني حلم العودة ونحن حلم الرحيل

هني الامل ببكرا ونحن الهياكل الممحية

هني السهرات العمرانة ونحن الجرح المفتوح

هني المستقبل الافضل ونحن بيادق المواجهة

هني خيالات السهر ونحن ساحات النضال

هني الوطن بقلب الغربة ونحن الغربة بقلب الوطن

هني عناوين النجاح ونحن الاسامي المنسية

هني الارادة الباقية ونحن الاجنحة المكسرة

هني حكم القانون ونحن سطوة الجلاد

هني الافاق المفتوحة ونحن الشبابيك المسكرة

هني نبض بيروت ونحن ترابها اللي جايي

هني صخب هالدني ونحن شوارع العاصمة المظلمة

هني سنابل الحرية ونحن السنابل المدفونة تحت اهراءات بيروت

هني نوستالجيا الرحابنة ونحن سالم الغفيان

هني رواد العالم الحر ونحن ضحايا نظام ابوخشبة

هني العلم البعدو مرفوع ونحن جمر الاستسلام

هني اللي بعدهم عايشين ونحن اللي صرنا ميتين

ويا سنين اللي رح ترجعيلي، ارجعيلي شي مرة رجعيلي...

Share

Comments

Add your comment