منى حسن

بأعتبر الحياة لوحة جميلة مرسومة بنقاء وحب ووضوح وخطوط واضحة والوان متجانسة.. لوحة كل حاجة فيها مخطوطة لتكمل بعض حأعتبر دى الحياة ، الحياة اللى احنا بنعيشها هى اللوحة دى... أحداث الحياة هى الاضافات اللى حنحطها جوة اللوحة زى لون زى شكل زى جماد زى ماده او أى حاجة زيادة عن اساسيات خطوط اللوحة الموجودة...

مغزى كلامى او اللى انا عايزة اوصله ان الحياة بخطوطها وتفاصيلها اساسي أبدى أى حاجة إتضافت جوه الحياة دى غير المخلوقات فهى بفعل البنى آدم، والبنى آدم له تأثير ويد في مسيره الحياة وتغيرها سواء بالايجابية او بالتدمير او بالسلبيات...

اللوحة لو نقص منها لون مش حيأثر عليها ولو زاد عليه لون مش حيأثر عليها ، إنما لو اتحط فيها بطش لون فمع الوقت حايحصل خلل للوحه، وهى دى احداث الحياة اللى بتحصل، اللوحة دى كبيرة اوى أى نقطة فيها مش مؤثرة في بقية الحياة انما مؤثرة في مربعها في نظرة العين في المنطقة اللى هى فيها، انما لو اتشالت او اتمحت او اتعدلت اللوحة بترجع عادى سيمترتها...

المشاكل والاحداث اللى بتحصل فى الحياة بتحطك تحت ضغوط كأن الحياة وقفت أوكأن كل حاجة بقت مش كويسة وبتتناسى ان فيه حاجات تانية كويسة لأنك مبتبصش حواليك انت بتبص للحدث، فبقت حياتك كلها أحداث كلها ضغوط ونسيت انك تخرج بره الضغوط دى وتبص على بقية اللوحة وهى الحياة.....

لأن حياتك كبنى آدم وفرد عاملة زى لعبة الـ puzzles دى مسيرة الحياة بتاعتك ومع كل وقت ولحظة وزمن حتة من البازل بتتركب ودايما عندك حتة ناقصة لأن هى دى الحياة، إلا أن بكتمل لوحتك كاملة بالقطع كلها وبتكون دى نهاية رحلتك....

القطع دى بتاعة puzzels مش انت اللى راسمها لكن انت اللى بتحطها، بترسم حياتك لأن انت عندك عقل، في اوئل الحياة الأكبر منك هو اللى بيرسمهالك لكن بعد كده إنت بتاخد زمام حياتك...

لوحة الحياة غير لوحة البازل.. لوحة الحياة ثابته بخطوطها انما البازل لأ، البازل ثابتة في مسيرتها انما هى لها تأثيرات كتيرة اوى علشان هى داخل جواها احاسيس وداخل جواها معاملات وداخل جواها تأثيرات كونية وتأثيرات دنيوية وارتبط البنى ادم بالحياة والكون واحد لأن الدنيا فصول وحياة البنى ادم فصول وحياة البنى ادم فصول، والدنيا فيها أحداث غير متوقعه والبنى ادم برضه عنده أحداث غير متوقعه....

الحياة مرتبطة بالبنى آدم والبنى آدم مرتبط بالحياة وتأثير العيشة على البنى آدم هى فعله... التطور خلق الأمراض وخلق الأنانية وزرع الحقد والقوة والسلطة اللى لغت الانسانية، طبعا فيه ايجابيات انها ريحت البنى ادم وسهلت حياته بس سهلتها زياده عن اللزوم انها خلت مسؤليته تقل، احاسيسه تقل، وانتماؤه يقل، وحاجات كتيرة اوى تقل....

 زى ما البنى آدم أذى الحياة والبشرية لازم يرجع يفكر تانى ازاى يحل الدمار ده، ازاى يرجع بيئة الحياة تاني صحية زى ما اتخلقت نقية... إحنا ظروف الحياة بتاعتنا إبتدت تتغير المية ابتدت تقل الحرارة ابتدت تزيد والبشر ابتدى يزيد فإبتدى يساعد على الكلام ده لأن استعمالاته في الحياة هى بتزود الدمار ده.. لازم نرجع تانى للحياة البسيطة، للحياة الطبيعية، انا مش بأقول زى العصر الحجرى، ولكن لازم نستعمل حياتنا بطريقة أو بأخرى الحاجة الطبيعية علشان نعيش صح نتنفس هوا نضيف نشرب مية نقية ناكل أكل من الأرض نضيف مش ملوث ، ريحتنا ترجع تانى زى ما كانت، طبعاً ده حلم علشان لو 20% عايزين ده 80% متعايشين ييه مش مدركين أوى الموضوع، فهل الـ 20% ممكن يكونوا مؤثرين ما أعتقدش لأنه لو كانوا كان نفع الكلام ده من زمان،

 هو الحملة اللى إحنا لازم نعملها إن نرجع الحياة حياة عادية بسيطة

بيئية تانى مش موضوع بقى (شعارات زى الحفاظ على الأخضر وغيرها) لأ بيبتدى يحصل عملة تسويقية لكل حاجة طبيعية موجودة في السوق من الحاجات اللى كانوا بيشتغلوا بيها زمان من قبل التطور التكنولوجى، زى الموجات اللى بتأثر على الجو زى الدخان اللى بيأثر على الجو ونرجع تانى للحاجات العادية اللى متأثرش على (المناخ) متساعدش على الحرارة متساعدش ان خرم الأوزون يزيد متساعدش على الإحتباس الحرارى متساعدش على ان التلج يسيح متساعدش على حاجات كتيرة أوى، إحنا عملنا مشكلة لنفسنا، إحنا خنقنا نفسنا بنفسنا، تحت اسم التطور، مش ممكن بالعلم ده كله محدش فكر إن مع الوقت إنه حيأذى الحياة الدنيا العيشة مش البنى آدم بس.

 اللوحة مهمة انها تفضل لوحة جميلة وخطوطها لسه تبقى واضحة والوانها تبقى زاهية لأن الاضافات اللى اتحطت عليها ابتدت تطفى زهو الألوان وابتدت الخطوط تتعرج وواضح ان اللوحة حتنهار مع الوقت انقذوا حياتنا انقذوا بيئتنا انقذوا دنيتنا انقذوا الدنيا وارضنا علشان تنقذوا البشرية.

*مصرية

Share

Comments

Add your comment