الرئيسية

مقالات وآراء

شقلبه حال بنظره..

04/20/2025 - 01:11 AM

من خواطرى.........

بقلم منى حسن

العادي فى يومك بتتعامل، والوقت بيجر الوقت، ويومك بيخلص وتعيد وتيره حياتك بسلام وحمد..

بتشوف ناس، ‏بتقابل ناس، وبيدخل ناس على حياتك، وتسمع صوت ناس، وبيدور جوا اليوم تعاملات مع ناس تعرفهم وما تعرفهمش…

‏فجأة في لحظة تلاقي وتيرة يومك وطبيعته اتلخبطت كيانها، ‏تلاقي حاجات غريبة بتحصل لك ومن حواليك، ولا أنت دارى اللي جرى فجأة..

واضح ده بيحصل لناس كتير لما تبقى قاعد كده فى أمان لا بيك ولا عليك وتلاقى مكالمات وتداخلات واسئله مليانه فضول عنك تحت ستار اهتمام بيك..

فجاءه بعدها تلاقى لخبطه حياه عجيبه بأحدثها وشقلبه وعكوسات، حتى تلاقيها كمان على شغلك وبتنعكس على يومك وحاجات كتيره تانيه بتبقى مش مفهومه ..

بيحصل لك شقلبه بتكون مش نفسك، بيحصل خروج من المسارالاصلى للحياه، كأن عليه تشويش او فرمله بعجله معوجه ماشيه باتجاهات مختلفه وساعات بتبقى معاكسه..

شئ مش مفهوم!

وممكن كمان بمجرد سماع صوت بنى ادم، اسئله من بنى ادم، عين بنى ادم، من نفس بنى ادم مشوشه حاسده لا تتمنى الخير وان كان ظاهريا الاهتمام هو اللى الواجهه والحقد جواه دفين..

صحيح مش كل النفوس نقيه.

الغريب ان صحيح الحسد موجود ومذكور، ولكن كان من الصعب تصديق انه واقع، وان فى ناس فعلا كده،

وبان صوت بنى ادم عن بعد او حتى بنظره ممكن تأذى شخص، وممكن تؤدي لعواقب صعبه لو حصلت فى واقع الحياه يعاقب قانونا على توابع فعله من أذيته، ولكن العين والحسد والحقد غير ملموسين بس شعاعهم صايب المقصود لحد ما يجيبوا داغه الأرض!

للاسف لما تفكر فى اللى اتأذى تلاقى هو ايه ذنبه ان يجرى له كده. وليه وايه نفع المؤذى من أذيه شخص برئ وارجع للشخص اللى كله شحنه سلبيه وعمل كده سواء بقصد او من غير قصد، بانه للاسف اذى بنى ادم بالنقص اللى عنده او المشكله اللى رسبت عنده الإحساس ده، سواء كانت ممكن مشكله قديمه من الطفوله او من الأهل، وممكن تفاوت اجتماعى، او مادى، او ثقافى، وممكن اختلاف شخصيه، وممكن مركز اجتماعي، هى ممكن حاجات كتير تانيه على حسب نقصه، لان داخل الانسان مجموعة من التناقضات والنواقص والسلبيات، ودى بتظهر النفوس الضعيفة وخصوصا من هذه النوعيه من البشر..

‏الأغرب في الموضوع بعد تساؤلات ومحاولات بحث عن الأمور اللي بتحصل، وبتتغير حياة بني آدم بسبب فعل ناس تانية، الحقيقه اتصدمت بفكرة إن فيه ناس بتدخل في مواضيع وبتعمل أعمال وبتستعين بناس تؤذي بيها ناس بأشكال مختلفه، وده موضوع طلع شايع، بس كان أول مرة أدخل جوه هذا الموضوع ده بأسئلة وبحث، واستغربت باستسهال الشر لأذيه بشر، مجرد أن في غيرة أو حقد، أو أنه مش شاكرالنعمة اللى عنده وبص على نعمة غيره، او نفسه فى نعمه غيره، او حتى مش عاجبه وجوده.. ‏متناسى ان في قسمه عدل مع يوم خلقه..

‏الموضوع ده أول مرة أشوفه وأسمعه، خصوصا ان فهمت ان الحاجات دى موجوده ومليانه على برامج وبوست صفحات السوشيال ميديا عاديه جدا، وغالبا بيسئ استخدامها للجهل وعمى البصيره وان فى تخصص من ناس كمان بتعمل كده.

الموضوع صعب الاستيعاب لانتشار الجهل او نفوس سوده، سواء من ان حد ممكن يفكر يأذى بنى ادم، او ان بنى ادم يملاه فكره وتعمى بصيرته بان شايف ان فى حد احسن منه او معاه حاجه مش عنده فيؤذيه..

هو راح فين حب الخير للتانى، ولا الود والرحمه بإحساس الرضا، ولا الإيمان راح فين. هو ايه المنفعه فى أذية الآخر او تمنى زوال نعمته او حياته وايه الاستفادة، خصوصا انه انسان شخصيته وظروفه ووضعه مختلف، وان له كينونه مختلفه أصلا.

عمى القلب وعدم تمنى الخير للآخر.. مرض!

والأدهى لما يكون مستتر بتداخلاته فى حياته تحت قناع الحب والعطاء والاهتمام الوهمى الغير حقيقى، لمجرد الدخول فى دهاليز حياته لمعرفه أخباره، لاستخدامها فى الكلام عنه او إشباع غريزته او للقر عليه..

التربيه والنشاه من الصغر لها دور كبير فى صلاح النفس، واكيد الجو العائلى والاجتماعي سبب اساسى فى بناء شخصية الانسان السوي.

لو ادرك البنى ادم الغلط يقدر يعالجه، ويحسن من اى سلبيات او نواقص مر او يمر بيها او يتمنى وجودها فى حياته، لان الغل والحقد والحسد او السحر ما هو إلا نكبه عليه ، واذى انسان برئ عايش فى حاله وحياته، اللى أكيد بيمر فيها من فرح ونجاح، وحزن ومعاناه، ومرض وضغوط ومشاكل زى اى من البشر، ولان هى دى سمه الحياه، وأنه زى كل واحد بيمر بكل الظروف بطرق وظروف وأساليب مختلفه..

العلاج بسيط أرضوا بنعم الله اياً كانت، وخليكوا فى حالكم، وطيبوا انفسكم، وماتقيموش اللى حواليكم، كل واحد معايير نفسه وحياته مختلفه مالكوش فيه..

الحياه مش سهله باى مقياس، غنى فقير، فرحان زعلان، مهموم مرتاح، الحياه دوره كامله فى حياه كل بنى ادم، كل واحد عالم بحاله وحياته، بطلوا تداخلات وسيره الناس ، يا ريت كل واحد يخليه فى نفسه ويبعد حقده وحسده وغله ويحاول يعالج نفسه!

سيبوا الناس فى حالها.. وعلاج المأذى حصنوا انفسكم!

مصريه

قل اعوذ برب الفلق من شرور نفوس الخلق اجمعين