03/22/2023 - 14:53 PM
أحمد عبدالفتاح *
إحنا اللي بنغلط، لأن مع كُتر الفُرص اللي اديناها للناس على أمل إنهم ها يتغيروا للأحسن، وللأسف يطلعوا عكس ما كنا نتوقع ! ويكونوا همّا السبب الرئيسي في أذيتنا وتعبنا، لأن بمنتهى البساطة تجاهلنا كُل الإشارات اللي كانت بتقول إنّه ما ينفعش ولازم نمشي وننهي المهزله دى، لكن كُنا بنكابر ومشينا ورا أمل كداب، وضحكنا على نفسنا، وغمضنا عينينا عن الحقيقة، وكل ده علشان كنا خايفين نتقبل أمر هايكون واقع كمان شويه، وكذبنا حقيقة واضحة وضوح الشمس، وخوفنا من قسوة الوجع والحرمان.
ولكن بعد ما غمضنا عينينا عن الحقيقة هل الوضع اتحسن؟ هل ما اتوجعناش؟.
الإجابة للأسف يا عزيزي "لأ" !!
أدركنا الحقيقة متأخر واستوعبنا وفهمنا كل حاجة متأخر، وبردوا مشينا، عشان كدا أوعى تعاند نفسك وتفضل مكمل في الطريق الغلط، اللي بيحبك ها يتغير علشانك، اللي بيحبك ها يحافظ عليك، اللي بيحبك ها يرفع من قيمتك ومكانتك قدام كل الناس، واللي مستغني عنك ها يبيع مع أول فرصه !
دايمًا صدق الصوت اللي جوّاك، ولما تحس إن في حاجة غلط أمشي عشان صدقني ها يطلع فعلًا في حاجة غلط..
- مقالات صوت من القلب لـ أحمد عبدالفتاح: تُعبر عن مواقف وأحداث اجتماعية باللهجة العامية، بنسبة ١٠٠٪ هتلاقي نفسك البطل في واحده منهم.
Comments