جورج يونس

مش شايف انو رفاق كتار فلو، وبلشت تنطوي ذكراهم خلف النسيان، وصار التراب مطرحهم، بهاك المرقد الما بتزورو الا الوحدة، بوقت انتَ بعدك سكران بالفخفخة وشوية مجد باطل؟

مش شايف انك عم بتدافع عن منفعتك الخاصة بوج مطالب اخوتك الي غمرهم الظلم المتمثل بكل شخص انت بتنتفع من ورا بوسط كل هالفوضى، بوقت رفاقك واخوتك يمكن عم بموتو ع رغيف الخبز بسبب ظلم هيدا الشخص وامثالو؟

مش شايف انو الناس لما صرخت من وجعها، ما كانت بتهوى الثورة وبهدلة الطرقات؟

مش شايف انو خلف بسمة كتار، فيه حرقة قلب وغصة عمر ووطن ومستقبل معلق بحبال الهوا؟

مش شايف انو الشعب اللي طول عمرو بيعشق الكلمة والفرح ونسمة المجد الطالعا من جبالنا، صار مصادق الزعل ومساكن العتمة ومعانق الوجع مع كل طلة فجر كان بيحلم انو يكون احلى؟

الاحزاب سرقت الثورة؟ طيب وانتَ شو عملت؟ مش سامع أنين الناس المتروكة، والمصلوبة بجهل اجرام قياداتها، واللي ما كانت بتنزل عالشارع لو ما الدني اسودت بوجها، وفقدت الامل بكل شي بهالوطن؟

كرمال الله بس خبرني اذا انت ناسي، انو ما حدا منا باقي ومخلد بهالدني! قلي لأمتين، يا المفروض انك خيي بهالوطن، بدك تضل تدافع عن اي حدا إلو علاقة بهالمنظومة وتبعياتها وكرمال شو؟ يا هل ترى مش حاسس وشايف وين وصلنا وشو اللي عم بصير فينا؟

انتَ وقاعد ببيتك عم تنتقد الحُرْ المحروق قلبو، واللي نزل عالارض لانو شاف وين وصلت الامور بوطننا، ولانو شاف كيف اولياء الوطن صارو فوق الريح، ولانو حس بإحتقار تجار الدين والسياسة والمال لذكاؤو، ولَ حقو بإنو ما يكون عبد لحدا، ما بتستحي من حالك وما تخجل من خيالك المدعوس بالتبعية لانك رضيت بالاستحمار والاستزلام وتشبثت بمبادىء وهمية بس لانك منتفع او مستفيد او ناطر حسنة او لمجرد انك رافض تصدق انو كل اللي انتَ أمنت فيهم طلعو كذابين، وانك ما ممكن تتقبل انو ينقال عليك كنت مغشوش لسنين وسنين بشعارات ما إلها اساس غير حب الذات والسيطرة والاقطاعية؟

اذا مع كل اللي صار فينا من ٥ سنين لليوم، ضليتك قاعد بالبيت، وما فكرت تنزل تصرخ بوج الظلم، وما فكرت تحرق الارض كرمال مستقبل افضل لإلك ولولادك، وما غلي دمك لشوفة بجاحة كل مين دخل بالمنظومة اللي دمرلتنا عمرنا، اللي بيجي مرة وحدة، لانو هوي بدو يسيطر ع كل شي، ولانو هوي شايف حالو الله وانت عبد وخروف عندو، بتكون انت يا مش من هالبشر، يا مُسْتَحْقَرْ ومربوط، يا عديم الكرامة، يا جزء من العم بتاجرو بوجعنا، يا مش حاسس بالتعتير والقهر والجوع، ويا غرقان بنعيم مالي مجهول المصدر.

ما في حدا ما بيبكي وبصرخ من الوجع، حتى لو كان وجعو ناتج عن سوء معاملة اهلو. فكيف لما الانسان بينسحل، وبيغتصب حقو، وبتنداس كرامتو، وبتتفجر احلامو، وبتنسرق اعمالو واموالو؟ قلولي شو بعد باقي تما يصير فيه ثورة؟

بالنهاية مش الثوار، اللي انْتُهِكِتْ حقوقهم، بوطن اخذ منهم كل شي وما عطاهم شي، هني الزعران وهني سبب خراب اورشليم. واذا بوج كل هالظلم انتو بقيتو ببيوتكم وانتقدتو نضالنا بكل الساحات بتكونو انتو الاجرام والانهزام والخنوع والدجل والانانية والتبعية. فالشاهد على الجريمة هو شريك فيها ويوما ما سيحاسبه ضميره وربه على انه رأى اخوته موجوعين ولم يشاركهم وجعهم ونضالهم.

هلقد بحبك يا لبنان

Share

Comments

Add your comment