مـن خـواطـرى

بقلم منى حسن

مقايس الوحاشة فى البنى آدم بتتحسب من ايه، مقياس الوحاشة فى البنى آدم بتتقاس ازاى ، مقياس الوحاشة فى البنى آدم بيتحِكم عليها ازاى ومن مين .. وايه هى الوحاشة بتاعة البنى آدم ويقدر ازاى يستعملها بكلام ويفنطها ويحطها قدامه ويدركها وهل البنى ادم عنده الشجاعه الكافية انه يقدر يدخل جوه نفسه ويوجهها ويعدل فى حياته أو يغربل وحاشته بحيث انها تبقى في الآخر تتقلب لحاجة كويسة وايجابية! ولا حيكمل عليها ويبقى بنى آدم بيشع مليان وحاشة ..

 وايه هى الوحاشة اساسا، وهل الوحاشة فى عيون الناس وحدها ولا بالموقف والافعال ولا برد الفعل ... وهل الوحاشة دى البنى ادم نفسه بيعرف يقيمها، بيعرف يقول دى طلعت منى ازاى كده، ولا اللى قدامه هو اللى بيحكُم ...

العصبية وقلة الأدب والذوق والكدب والنفاق والرياء والمحلسة وقله الضمير وحاجات كتيره اوى من الحاجات دى تدرج فى مقاييس الوحاشة فهل البنى آدم اللى بيتعايش أو بيعيش بالطريقة دى طبيعته اوشخصيته اتبنت او بقت كده ...

 وهل البنى آدم بيبقى مليان صفات كتيرة من الحاجات دى ولا ممكن البنى آدم بتبقى شخصيته ساعات فيها خصلة واحدة منها، زى واحد كذاب بس أو واحد منافق بس، أو واحد ايده طويلة بس او واحد ضميره نايم وفى حالات ممكن يكون بيستعمل المجاملة علشان يدارى بيها حاجات تانية، وممكن واحد بيدارى حاجات فى حياته زى مثلا ابو لمعه (فشار) كلامه كله كذب وتهويل لتعويض نقص معين، بس هل دى تدخل فى الوحاشه ولا حاله نفسيه ولعدم التوجيه تمكنت وبقت خصله فيه..

هل الحاجات دى هو بيبقى شايفها انها حاجة وحشة ولا ده جزء من شخصيته ومعتبر ان التصرفات دى مافيهاش مشاكل، وان ده شئ طبيعى وايه المشكله، ولا الناس مابتقدرش تقوله انه ده وحش وسايبينه كده، فالموضوع بقى امر مسلم بيه، وهل الناس المفروض انها تلفت نظره ولا هما بيتحرجوا فمابيقدروش يقولوا له انه انت وحش، أو إيه الدرجة اللى ممكن يوصل لها البنى آدم في انه يوصل لنفسه ويقولها انا وحش فى كذا وكذا وأحاول إن أبطله وأحاول إن أنا أعالجوه وهل ده ممكن انه هو يحصل هل من الغلط انه يشتغل على نفسه ليحسنه ولا بيعتبر ده ضعف..  هل البنى آدم من الشجاعه الكافيه إنه يواجه نفسه بوقفه ويقول أنا حأبطله والا ده حيبقى نقص فى شخصيته لضعفها وتكوينه، أو حيأثر على نظرة الناس له لو إعترف بكده أو إنه هو من غير ما يعترف ويحاول يعدل نفسه، هل الناس حاتصدقه!

الــ هل كتيرة أوى، مش مفهوم ايه اللى ممكن يكون من نتايجها بعد كده، بس هى في الآخر حتكون حاجة ايجابية، لو إن البنى آدم دايما يتواصل مع نفسه من جوه ويحاول يصلح منها ويحاول انه هو يشيل الشوائب والحاجات الوحشة اللى جواه، علشان يبتدى يسمو بشخصيته وبشخصه وبطريقته وبالإحساس اللى جواه وبالطاقة اللى جواه بانها تطلع دايماً ايجابية على اللى حواليه وعلى نفسه هو الأول، لأنه هو لو حاول يكون كويس مع نفسه الأول حيبقى كويس مع كل الناس، ودى تبقى بداية صالحة لحياته وحياة غيره .. بس هل الشجاعه كافيه، هل الظروف والضغوط كافيه، هل اللى حواليه حيساعدوه!

 هل هو قوى كفايه انه هو يقدر على مواجهه نفسه لانها صعبه، لكن محاسبه النفس شئ مهم لتحسنها..

مواجهه غلط الفعل يحسن من بلوره الشخصيه لان التمادى فى الوحاشه هو موت احساس وتدمير للنفس واهانه والاخر..

* مصريه

Share

Comments

Add your comment