09/19/2021 - 10:27 AM
جورج يونس
بأي حق بتقررو تكملو تشحدونا دولارات أودعناهم نقداً، من تعب عمرنا اللي راح، بالبنوك لنستعملها بأخرتنا وبإيام اسود من وجوهكم، ع سعر 3900 ليرة بينما الدولار رايح عال 30 و 50 الف، وفق هيدا مربحيننا جميلة؟
بأي حق بتتحكمو بلقمتنا وبتحقيرنا وبمصير حياتنا بأسوأ إيام عمرنا؟
بأي حق رياض سلامة اللي صارف مصرياتنا عال سيغار وع صاحبيتو وفاتح شركات بإسمهم وبإسم خيو ومستفيد من فساد منظومة كاملة، ليبتزها ويكدس ملايين الدولارات، بقرر يكمل يذلنا بسعر دولار بيقتطع فيه 85% من اموالنا عالسعر الحقيقي؟
بأي حق بترفع الدعم وبتبيعنا المحروقات ع سعر الدولار الحقيقي وإنت قارط حلالنا وخميرة شلناها لأخرتنا ولولادنا؟
بأي حق بتعتبر حالك الحاكم بأمرك، بس لأنك بتعرف كل ملفات الزعران وماسكهم بخوانيقهم تيسكتو عن فسادك، وتتكملو سوا سرقة أموال شعب صار 80% منو تحت خط الفقر بسببكم؟
بأي حق بتبيعنا المازوت بفريش دولار لندفي بيوت إنتو جلَّدْتوها من البرد والجوع، وبتقرر إنو تكمل تسلمنا دولاراتنا باللبناني وبالقطارة عال 3900 تنرجع نجمع اللبناني ونشتري دولارات منكم ع سعر السوق بدل حق المازوت؟
إنت يلي غطيت الفساد لتبني إمبراطوريتك الفانية، مجرم بالخط العريض، وإذا نحن رح نموت من البرد والجوع لأنو المجرمين ببلادي خلونا رهائن لقراراتك ولعهرك اللي ما كانو ينتهو، فإنت بإنتظارك مع كل المنظومة نار جهنم اللي رح تْوَصِّلْ ريحتكم أنتو وعم تحترقو بنارها لأرضنا المقدسة بكرا لما يتخضعو لعدل السما.
نعم لوقف ابتزازكم وللإفراج عن أموالنا بالدولار يا سفاحي هالإيام. لا شبعتو ولا رح تشبعو لأنو ما بقى تعرفو الله، ولا وألف لا لتمديد دفع االودائع بالدولار المحتجزة بالمصارف على سعر 3900 ليرة!
هلق صار بدا #لا_تسكتوا بس من قبل أصحاب الحق ومش من قبل اللي حاميين الفاسدين مين ما كانو يكونو! نحن منا عبيد ولا رهائن عندكم وما بمون ع راسنا وروحنا إلا ربنا لأنو الحق معنا بوج كل مين غطى وحمى وشارك ونفذ.
هلقد بحبك يا لبنان
*الكتابات والآراء والمقابلات والبيانات والاعلانات المنشورة في اقسام المقالات والاقتصاد والأخبار لا تعبّر بالضرورة ابداً عن رأي ادارة التحرير في صحيفة بيروت تايمز، وهي غير مسؤولة عن أي نص واو مضمونه. وإنما تعبّر عن رأي الكتاب والمعلنين حصراً.
Comments