10/21/2024 - 08:28 AM
جورج يونس
وينن اللي كانو يحاربو بسيفك؟ لما وقع السيف وقعو معو!
وينو اللي كان يدبح بضفرو لأنو معك؟ قص الضفر ولبس ثياب الملايكة!
وينو اللي كان حاطط بارودتك ع كتفو؟ نقل البارودي ع تاني كتف!
وينو اللي كان بدو يخوض البحر معك؟ هرب ع بلاد الله الواسعة!
وينو اللي كان خير كتافو من ورا بطشك؟ عم بفتش ع باب رزق تاني!
وين اللي ما كانو يْقَدْرو الجيش؟ صار الجيش بعيونهم!
وين اللي كانو بدهم يستردو كسروان؟ صارت كسروان ملجاهم مثل ما كانت ملجاهم عبر التاريخ!
وين اللي كان شايف المتظاهرين والاوادم برغش؟ صار عم يحلف وحياتهم!
وين الدول الحليفة منك؟ متخباية خلف مصالحها ومفاوضاتها البناءة مع أعدائك!
وين القرش الابيض؟ لِحِق الايام السودا!
وين فائض القوة عالاوادم والمسالمين؟ صار تضرعات رحمة مرفوعة لرب السما!
وين اللي ما كان قاري حدا؟ صار الحكاية اللي بتسلم عالخبرية!
وين الانسان من كل اللي وصلنالو لأنكم ما كنتو توعو وتهتدو؟ صار بخبر كان!
وين مبارح من اليوم، واليوم من بكرا، وبكرا من الوجع اللي جايي؟ تشرد ع بواب الفقر والهجرة والطرقات والمقابر والمستشفيات!
وين الضمير عند كل دول العالم؟ ع بواب تجار السلاح والادوية والمساعدات وصفقات إعادة الاعمار!
وين العقل بحفلة هالجنون؟ ع حدود العصفورية!
وين الولاء الحقيقي بس للبنان؟ ع خطوط الاحتلال المقنع والاستعمار اللي غافي خلف الوقت!
وين الجميع من غضب الله؟ ع مداخل جهنم!
وين نُخَبْ وادمغة هالوطن؟ مدفونين ورا سلبطة العنجهية ووقاحة المجرمين والزعران!
وين الوطن من الجميع؟ ع حفة اخر إنهيار!
حذرناكم من عشرات السنين وانتو ما كنتو تسمعو! لا نَفَع معكم الحكي، ولا نفع بوجكم النضال، ولا نفع ضد بطشكم القانون، ولا وعى ضميركم القلم، لصار دم اهل هالوطن وخرابو هني القصة للمستقبل اللي يمكن بعد جايي.
ضلكم تذكرو، إنو لما صرخنا #كلن_يعني_كلن كتار لا كانو بدهم يصدقو ولا كانو بدهم يسمعو!
هلقد بحبك يا لبنان.
Comments