02/22/2022 - 00:27 AM
بقلم جورج يونس
بكرا البرد بتخلص إيامو والثلج بِـ دوب فوق جبالنا
وبيرجع الزهر والحلا يكحلو روس تلالنا
والمي بتكرج سواقي مكرسة بحبها لارضنا
وبتحمل معها بصمت تراب كل مين منحبو وسبقنا
ومعهم شوية شوق ووفا، وكتير من ذكرى الاحبة
ومن فوق بترجع السما صافية تحرسها الملايكة
تناجي ريحة البخور الطايفة ع دروبنا
والذكريات بتوعى بلفحات عنفوان تعبي صدورنا
ومنسمع همس عالهدا من خلف الصلا
ينادي الحنين لأمجاد فرسان صارو بالسما
وبعدها بركي بيندق باب الضمير عند كتار من يلي باعو الضمير
ويمكن يرجع التاريخ يفتح بوابو من جديد
ليذكر كل مين باع واشترى بشعب ووطن مجيد
إنو نحن عالارض زوار مش تجار
يا منحفر بالصخر اسمنا بالمجد والتضحيات
يا بيخطفنا العفن لخلف اللعنة ع صدى ظلم الافعال
يا بْيِنْقَحْ النسيان اسامينا بكتابو لأنو التاريخ ما بيحضن الا المبدعين والابطال.
ويا هاك البطران ال بعدك سكران بمجد هالدني
فتاح قلبك وشوف خيك بقلب الوطن كيف صار منفني
بالعز انت عالأرض غرقان وهو والفقر صار سوية
بعد ما خطف منو عهار هالزمان
الراحة والامل ولقمة خبز صارت بالذل مكوية
هون ما بِخَلٌدْ منا الا التراب بس السما للحق بتبقى هوية
فوق العدل عالباب وحدو أحقية،
تذكر بس انت وماشي ب شلالات المي الدافقة ع هالطرقات
انو حباتها غمرت تراب قديسين ورفاق بالسما كلمتهم صارت مدوية
وصعبة بقى تنداس من قبل تجار بطلت تعرف معنى الأخلاق والحرية.
هلقد بحبك يا لبنان
Comments